Sistemi ndalon automjetin në rast të problemit shëndetësor

Vozitësit e moshës më të vjetër bien në grupin e rrezikuar të vozitësve të cilët gjatë vozitjes mund të përjetojnë sulm në zemër dhe me këtë të rrezikojnë pjesëmarrësit tjerë në trafik. Mu për këtë, bavarezët janë duke punuar në një sistem të sigurisë i cili në raste të tilla do të merrte kontrollin mbi automjetin dhe do ta ndalonte.

Emergency Stop Assistant aktualisht është në fazë eksperimentale, derisa në BMW pohojnë se sistemi është i aftë të dëshmojë komplikimet shëndetësore tek vozitësit dhe në mënyrë krejtësisht autonome të merr përsipër kontrollin mbi automjet.

Sistemi do të fillojë me një manovrim të sigurisë ashtu që do të aktivizojë të katër treguesit e drejtimit, derisa radarët e tij do të fillojnë të kërkojnë pjesën e parë të rrugës ku automjeti do të mund të ndalej në mënyrë të sigurt. Sistemi Extended Emergency Call më pas u drejton një thirrje urgjente shërbimeve kujdestare dhe me anë të sistemit GPS përcakton lokacionin e saktë të automjetit.

Tani për tani nuk dihet se kur do të shohim një sistem të këtillë tek modelet serike, mirëpo vozitësit me probleme shëndetësore sigurisht do ta vlerësojnë këtë teknologji të re.