De Rossi: Transferimi i Ronaldos tregon se po mbesim mbrapa

Mesfushori italian i Romës, Daniele De Rossi, ka paralajmëruar për dobësimin e Serie A, duke thënë se skuadrat italiane nuk mund të garojnë me ato spanjolle dhe angleze në cilindo nivel.

“Skuadrat angleze dhe spanjolle janë në një planet tjetër. Thjeshtë mund të bazoheni në finalen e Ligës së Kampionëve (Barcelona - Manchester United)”, ka thënë italiani.

De Rossi mendon se largimi i Kaka nga Serie A dhe kalimi (në pritje) i Cristiano Ronaldos te Real Madridi për një shumë marramendëse parash, tregon dominimin e këtyre skuadrave në raport me skuadrat italiane.

“Ronaldo? Disa shifra janë jashtë kësaj bote, mirëpo pa retorikë, ky është futbolli. Lojtarët të cilët janë më të mirët në botë, siç është Messi, ndoshta vlejnë aq para”.

“Dallimi ekonomik ndërmjet një klubi italian dhe ndonjë klubi të huaj (anglez dhe spanjoll) është i madh dhe do të thellohet edhe më shumë në të ardhmen. Vetëm Interi mund ta mbajë hapin me të tjerët”, ka shtuar mesfushori romak.